سيادة الرئيس…انا ممتعض
لاء..مالي ممتعض لانك افشلت المؤامرة العالمية ذات الخيوط القريبة و البعيدة ضد
سوريا….حلال عليك بصراحة….
بس انا ممتعض من خطابك كلو بشكل عام…
انو مليت من المؤامرات و ما عم افهم ليش العالم حاطط نقرو بنقر سوريا….بال 2005 ….وقت
عن جد كان في محاولة اسقاط الحكم بسوريا….وقتها ما حدا تظاهر بسوريا و طلب حقوقه…
معظم السوريين التفو حوليك…و طلعت علينا بخطاب بيشبه بكتير الخطاب يلي سمعنا مبارح…بأستثناء
النكت…كانو اهضم بال 2005 بأعتبار وقتها ما كان في دم عشرات السوريين عالارض و لسا
ما نشف……
وقتها حكيت مؤامرة و ما حدا اتمهزأ بهل الكلام….انو واضحة و باينة….و اجيت و وعدتنا
بأصلاحات و بأنو همك هو مصلحة شعبك….و صدقناك و التفينا حوليك…
6 سنين….و شعبك شاف انو كأنو الرئيس ما ساووا شي بيتناسب مع متطلبات الشعب…… بعدين
شافو اشقائهون بالذل و الفقر بمصر و بتونس قدرو ياخدو زمام الامور و بلشو يتناقشو
كشعوب كيف يبنو بلدانهون……شعبك..فكر انو ليش لاء…كان مفكر انو البديل الوحيد هو
سيناريو العراق….بس سيناريو العراق اجا بحرب خارجية ضد شخص…. شفنا مصر و تونس….انو
ممكن نغير بدون ما نقتل بعض….شعبك فكر انو انا كمواطن سوري شو بدي؟ بدي عيش حياة
كريمة…و الحياة الكريمة ما هي بس انو ما قواص و مافي اسلاميين او اسرائيليين
بالشوارع….الحياة الكريمة يلي يمكن الشعب عم يفكر فيها هي ببساطة حياة مافيها سرقة…مافيها
رياء..كلو عندو نفس الحقوق…و القانون بيحمي الكل و بيحمي حرية ممارسة دينهون و
شعائرهون….حياة فيها حكومة عم تخدم الشعب….حياة مافيها خوف من انو نحكي عن الغلط….ما
بدي دويلة طائفية و ما بدي شي غير يلي عندي حاليا مع زيادة الحقوق الوطنية و
الانسانية و الاقتصادية….
شفنا مثال جديد غير العراق…مثال حضاري و ان كان صار فوضى….بس الفوضى بمصر و تونس
يلي صارت ببداية التظاهرات كانت بسبب مؤامرات خارجية على حسب خطابات مبارك و بن علي…..الشجعان
من هالناس…بدرعا..قالو نحن السوريين مالنا اقل شجاعة على الكلام عن حقوقنا من
المصاروة و التوانسة….فطلعو و كتبو شعارات بتطلب طلبات متل طلبات اهل مصر و تونس و
يلي هي طلبات اي مواطن عربي…طلبات بتخلينا نقول حاجتنا نكون عرب جرب و نبكي انو
العالم كلو سبقنا و انو الامبريالية و الصهيونية هنن سبب تخلفنا…..هالعالم كتبو
شعارات و رددوها….و بالنتيجة تم التصدي لهم بالرصاص الحي…. مافيني اضحك ع نكاتك و
صورة شب سوري مغطى بالدم بس لانو حكى شي موجود بقلوب غالبية السوريين. لسا علقانة
براسي..
انا ممتعض من كلامك عن الفساد….شلون بتتوقعني صدق وعودك بالوقت يلي عم تقلي انو تمت
مكافحة الفساد بالعام 2005…و قلت انو اسماء الفاسدين كلنا منعرفها و تم مكافحتها….لك
ما طبعا كلنا منعرفها…و عبد الحليم خدام هو مالو الوحيد على القائمة….يعني معقول
مالك سمعان عن القوانين التفصيلية و التفضيلية يلي بتصدر لمصالح اشخاص مقربين
لعيلتك و نظامك…انا ما عم استوعب شلون بتخاطبني و بتقلي انو مافي فساد و بدك ياني
صفقلك….
انا ممتعض انك عم تحكي عن “قيادة” عم تقوم بدراسة حياتنا….مين هدول؟ شو مؤهلاتهون؟
مين عينهون؟ انا ليش بدي اثق بقراراتهون و هنن صرلهون عقود من الزمن و الحالة ما عم
تزداد الا سوءا…. انا اذا عندي دكانة و جبت مدير عام ليديرها…بعد عشر سنين اذا
الدكانة عم تخسر…بحقلي شكك بقدرات هالمدير على ادارة الدكانة…
انا ممتعض انك عم تضحك على عقلاتي و تقلي نحنا مقاومة….و انا بصدق و بسكت عن حقوقي
و حريتي و بخلي زلمك يركبوني…بس لسا الجولان مو معنا.. و رح اتناسى لواء اسكندرون
….لسا عم يصير غارات على اراضينا من قبل العدو الاسرائيلي و كل يلي عم تساويه هو
الاحتفاظ بحق الرد….و بتقول انو سنسترد الجولان من خلال عملية سلمية لا حرب…طيب ليش
بدك ياني حارب اذا انت ما بدك تحارب؟….ليش انا لازم ادفع ثمن حالة المواجهة اذا
اساسا مافي مواجهة؟
انا ممتعض انك عم تتهم السوريين بالطائفية….
انا ممتعض انك عم تشكك بوطنيتي بمجرد اني عم شكك بأدائك كرئيس….
ببساطة سيادة الرئيس… انا ممتعض انك عم تعاملني كخاروف….
من موقع حشيش سوري